by admin | Јул 5, 2019 | Соопштение
М-НАВ АД Скопје најостро ги демантира и со индигнација ги отфрла шпекулациите во одредени медиуми за можен судир на два воздухоплова. Изјавите од таканаречените свиркачи/експерти претставуваат еклатантен пример за непознавање на постапките и процедурите во воздухопловството, поради фактот што ниту еден настан неможе да се сокрие заради обврската за негово пријавување од контролорите на летање, но и од пилотите на авиокомпаниите.
Напротив, М-НАВ е активно вклучен во испитувањето на настани од било каков вид со инволвирање на цел тим експерти за следење и обработка на истите, чии заклучоци пак се проследуваат во зависност од нивната сериозност и итност до Агенцијата за цивилно воздухопловство согласно нивната итност, за што потврда можете да добиете и оттаму, како и до европските воздухопловни власти чиј дел е М-НАВ во согласност со преземената европска законска регулатива.
Секоја пријава за намалено растојание помеѓу воздухоплови во М-НАВ се класифицира според европските норми во случај на намалување на минимално пропишаните норми. Истите се пријавуваат од страна на контролорите на летање на посебни формулари, што е во согласност со позитивната домашна законска регулатива и европска пракса во воздухопловството, каде вакви и слични настани (кои не се исклучително ретка појава во авијацијата воопшто) се користат како би се извлекле поуки и препораки за нивно идно избегнување и надминување.
Воедно после доаѓањето на новиот менаџмент во Секторот за воздухопловна навигација, во последните две години се бележат одлични резултати во растот на сообраќај, кој е повеќе од 40%. Секоја година имаме надминување на рекордот во делот на број на прелети на ден, што беше случај и претходната саботата (29.06.2019 година) кога повторно го надминавме рекордот и достигнавме 1042 прелети на ден. Паралелно со ова зголемување на сообраќајот пораснаа и финансиите на Друштвото за повеќе од 5 милиони евра во периодот од две години што е резултат на посветеноста и работата на директните чинители во давањето на услугите во водухопловната навигација, Секторот за воздухопловна навигација предводен од новото раководство.
by admin | Апр 21, 2019 | Соопштение
Соопштение до јавноста за трагичната авионска несреќа во која животот го загуби четири члено семејство од соседна Република Бугарија
М-НАВ изразува длабоко жалење за трагичниот настан и сочуство до роднините на починатите. Би сакале да ги демантираме шпекулациите кои беа пласирани од разни медиуми во јавноста дека не сме дозволиле упатување на воздухопловот кон скопскиот аеродром и уште еднаш потенцираме дека му било одобрено да се упати кон скопскиот аеродром, согласно веќе одобрени план за лет каде алтернативен аеродром бил аеродромот во Скопје. Во интерес на истрагата и од почит кон загинатите и нивните најблиски апелираме да не се шират понатамошни дезинформации. Официјални информации за текот на истрагата ќе бидат дадени од страна на Комитетот за истраги на несреќи и сериозни инциденти во воздухопловството (КИНСИВ) и Јавното обвинителство (ЈО). М-НАВ целосно и транспарентно соработува со надлежните институции за поефикасно спроведување на истрагата и утврдување на причините за несреќата.
by admin | Авг 6, 2018 | Соопштение
М-НАВ А.Д. Скопје повторно го објавува огласот за селекција на кандидати за школување за контролори на летање!
Професијата на контролор на летање е димамична и одговорна а за истата се потребни специфични вештини. Од таа причина за селекција на кандидатите го користиме FEAST пакетот од тестови (прв европски тест за селекција на контролори на летање) со цел пронаоѓање на најсоодветните кандидати за обука за контролори на летање. FEAST пакетот се користи од страна на 48 организации ширум светот. Повеќе информации за FEAST тестот може да најдете на www.feast.info .
Самата професија бара високо познавање на англискиот јазик и од таа причина бараме од кандидатите да достават доказ за познавање на англиски јазик најмалку на ниво Б2. Со оглед на тоа дека FEAST тестот неможе да се полага повторно минимум во наредните 2 години од датумот на предходното полагање, кандидатите дополнително може да го проверат своето знаење со користење на готов бесплатен прелиминарен е-тест за англиски јазик http://www.cambridgeenglish.org/test-your-english/ . Не им препорачуваме на кандидатите со резултат понизок од 15 бода на овој тест да се пријават.
Дополнително, доколку сакате да проверите дали ги имате способностите и да добиете претстава какви вештини се бараат за оваа работа можете тоа да го сторите на забавен начин преку игри објавени на страната на https://www.nats.aero/careers/trainee-air-traffic-controllers/games/ , а можете и самите да се обидете да дознаете повеќе.
М-НАВ планира да објави „отворени денови” на кои заинтересираните кандидати ќе можат да ги посетат нашите простории и дополнително и на лице место да се запознаат со нашата компанија и работата на контролорите на летање. Следете ги објавите на нашата веб страница за информации наскоро!
На нашите кандидати им посакуваме успех!
by admin | Јун 30, 2018 | Соопштение
С О О П Ш Т Е Н И Е
Акционерското друштво во државна сопственост за вршење на дејноста давање на услуги на воздухопловната навигација М-НАВ АД Скопје ќе школува 7 кандидати за стекнување на дозвола за контролор на летање, 5 за Скопје и 2 за Охрид.
ОПШТИ И ПОСЕБНИ УСЛОВИ ЗА ПРИЕМ НА КАНДИДАТИ ЗА ШКОЛУВАЊЕ
1. да е полнолетен/а
2. да не е постар/а од 25 години
3. да има завршено најмалку IV степен на стручна подготовка
4. да има познавање на англиски јазик кое одговара најмалку на ниво Б2 (certificate B2)
ДОКУМЕНТИ КОИ КАНДИДАТОТ ТРЕБА ДА ГИ ДОСТАВИ
1. Пријава (пријавата може да се симне тука). Кандидатите треба во пријавата да наведат дали се пријавуваат за Охрид или за Скопје.
2. Извод од матична книга на родени
3. Уверение за државјанство
4. Доказ за завршено образование најмалку IV степен на стручна подготовка
5. Потврда од казнена евиденција издадена од надлежен суд – не постара од 3 (три) месеци
6. Уверение од кривична евиденција издадено од надлежен суд – не постаро од 3 (три) месеци
7. Документ/доказ за познавање на англиски јазик кое одговара најмалку на ниво Б2 издаден од овластена институција за изучување на странски јазик.
Горенаведената документација треба да се достави во оригинал или копија заверена на нотар најдоцна до 12.09.2018.
ОПШТИ ИНФОРМАЦИИ ЗА ПОСТАПКАТА ЗА СЕЛЕКЦИЈА НА КАНДИДАТИТЕ
Постапката за селекција на кандидатите ќе се спроведува во етапи.Секоја етапа е селективна, што значи дака во секоја наредна етапа ќе се повикуваат кандидатите кои ги исполниле условите од претходната етапа и тоа:
1. Благовремено доставување на пријава со бараните документи.
2. Доколку бројот на пријавените кандидати надминува 300, М-НАВ А.Д. Скопје ќе спроведе писмен предселекционен тест англиски јазик.
По спроведување на тестот ќе се изготви ранг листа на најуспешни максимум 300 кандидати.
3. Со најдобрите максимум 300 кандидати наведени во ранг листата на М-НАВ ќе се спроведе FEAST тестирање за поседување на општи и специфични способности, карактеристики и предиспозиции неопходни за школување за контролор на летање. (повеќе информации за ова тестирањето може да се најдат на веб страната www.feast.info).
Кандидатите кои предходно го полагале FEAST тестот нема да бидат повторно тестирани, но може да конкурираат со веќе постигнатите резултати од тестирањето. Им се препорачува на кандидатите кои го полагаа FEAST тестот во рамките на предходниот повик за селекција од М-НАВ во 2018 година, и кои биле известени дека не го положиле успешно FEAST тестот во согласност со EUROCONTROL стандардите да не поднесуваат пријави бидејќи истите ќе бидат одбиени.
4. Поседување на здравствена способност- лекарско уверение класа 3 согласно Уредбата за посебните услови, начин и постапка на утврдување на здравствената способност на персоналот во воздухопловството и другиот стручен персонал, роковите на важење на лекарското уверение и посебните услови кои треба да ги исполнуваат здраствените установи и овластен лекар поединец за вршење на здраствените прегледи на персонал во воздухопловството и другиот стручен персонал (Службен весник на РМ бр.49/08,87/11 и 169/13). Кандидатите лекарските прегледи ќе ги вршат во овластена здравствена институција и трошоците за нивното спроведување ќе бидат на товар на М-НАВ.
5. Доколку по спроведување на селекционите етапи 3 и 4 нема доволно успешни кандидати (минимум 10), етапата 3 и 4 ќе се спроведе за наредните 30 кандидати од предселекциониот тест од етапа 2, се до достигнување на минималниот број.
6. Со кандидатите кои успешно ги поминале сите претходни фази ќе се спроведе интервју од страна комисијата за селекција на кандидатите.
7. Доколку има повеќе успешни кандидати од потребниот број на некоја од локациите, М-НАВ може на успешните кандидати од едната локација да им понуди школување за другата локација.
8. Конечната листа на кандидатите ќе се објави во рок од 5 дена од денот на завршување на интервјуто, сметано од датумот на одржаното интервју со последниот кандидат.
9. Сите кандидати од конечната ранг листа се должни пред почетокот на школувањето да потпишат Договор за школување со М-НАВ А.Д. Скопје.
НАПОМЕНА
Ненавремената, нецепосната и некомплетната пријава и документација нема да биде разгледувана.
Кандидати за кои ќе се утврди дека предходно го полагале FEAST тестот а истото не го пријават ќе бидат дисквалификувани.
Со кандидатите кои успешно ќе го завршат школувањето М-НАВ А.Д. Скопје ќе склучи Договор за вработување.
Потребната документација за исполнување на условите во оригинал или копија заверена на нотар да се достави (лично или по пошта со препорачана пратка) во Архивата на М-НАВ А.Д. Скопје, ул Македонија бр. 25, 7 спрат (Палата Лазар Поп Трајков).
Условите наведени во Соопштението, кандидатите треба да ги исполнуваат во моментот на пријавувањето.
